Cerita Wayang

Anoman Duta

Anoman dados dhuta utusanipun Prabu Rama wonten ing nagari Pancawati, supados mitulungi Dewi Shinta ingkang dipundustha dening Dasamuka inggih Rahwana wonten ing nagari Ngalengka, saperlu badhe dipungarwa.

“Anoman, sira dakutus lunga menyang Ngalengka kanggo nulungi Dewi Shinta”.

“Nggih Prabu Rama, kula saguh mitulungi Dewi Shinta”.

“Mangkata menyang nagari Ngalengka!”

“Nggih Prabu Rama”.

Womten ing tengah margi, Anoman kepanggih kaliyan Jathayu ingkang badhe sirna dipunpejahi dening Rahwana, rikala badhe nulungi Dewi Shinta ingkang dipundustha dening Rahwana kanthi ngambah ing gegana.

“Kenging menapa panjenengan badhe dipunpejahi dening Rahwana?”

“Kalawau kula badhe mitulungi Dewi Shinta saking Rahwana nanging boten kasil”.

“Ngapunten Jathayu, kula boten saged mitulungi panjenengan amargi kula dipunutus Prabu Rama badhe mitulungi Dewi Shinta”.

“Nggih boten menapa, tulungana Dewi Sinta!”

Lajeng Anoman nilaraken Jathayu wonten ing tengah alas lan nglajengaken lampah tumuju ing nagari Ngalengka. Anoman lewat margi ingkang ketingal alus sanget menika sanes margi ingkang limrah nanging margi menika lathinipun Raseksa ingkang dipungelar saengga Anoman boten rumangsa menawi lumebet wonten ing tutukipun Raseksa menika. Dumugi padharanipun Raseksa, Anoman nembe rumangsa menawi piyambakipun sampun wonten ing padharanipun Raseksa.

“Raseksa, kenapa kowe arep ngalangi lampahku menyang nagari Ngalengka?”

“Aku bakal mbela Rahwana lan kowe ora bisa menyang nagari Ngalengka, kalahke aku dhisek yen bisa”.

“Tampanana iki Raseksa!”

Tekan ing nagari Ngalengka, Anoman lajeng lumebet wonten ing Taman Asoka kanthi mlumpati baluwerti saperlu kepanggih Dewi Shinta. Menawi sampun sepen, Anoman lajeng tetembungan kaliyan Dewi Shinta nanging kepireng kaliyan Dewi Trijatha minangka putrinipun Raden Gunawan Wibisana.

“Kula utusanipun saking Prabu Rama badhe mitulungi Dewi Shinta ingkang dipundustha dening Rahwana. Prabu Rama sakmenika nembe sedhih atine”.

“Menapa buktinipun menawi panjenengan utusanipun Prabu Rama?”

“Menika titipan saking Prabu Rama ingkang kedah kula paringaken kaliyan Dewi Shinta”.

Lajeng, Anoman maringaken sesotya saking Prabu Rama. Menawi sesotya menika dipunagem Dewi Shinta saged "pas" tegesipun Dewi Shinta dereng nate karasuk dening Rahwana lan nandhakaken bilih Dewi Shinta taksih suci. Dewi Shinta ugi maringi susuk kondhe minangka pralambang bilih Dewi Shinta ngentosi rawuhipun Prabu Rama, supados mitulungi Dewi Shinta saking Rahwana.

“Kula nitip susuk kondhe menika kagem Prabu Rama lan kula ngentosi rawuhipun Prabu Rama kangge mitulungi kula saking Rahwana”.

“Nggih, mangke kula aturaken dhateng Prabu Rama”.